Էրտողան կը մեղադրուի կրակի կառավարումը տապալելու մէջ
Թուրքիոյ նախագահ Ռեճէպ Թայէպ Էրտողանը քիւրտերուն կապած է երկրին մէջ մոլեգնող անտառային հրդեհներու հետ: Ան յայտարարած է, որ հրդեհներու գործով ձերբակալուածներու շարքին կան մարդիկ, որոնք կ'առնչուին Քրտական աշխատաւորական կուսակցութեան հետ, յայտնած է Ahval-ը:
Անոր խօսքով՝ ոստիկանութիւնը, հետախուզական ծառայութիւնները կը շարունակեն իրենց հետաքննութիւնները, եւ «անհրաժեշտ ամէն ինչ կը կատարուի»: Թուրքիոյ նախագահը նաեւ ընդդիմադիր կուսակցութիւնները մեղադրած է անտառային հրդեհներու դէմ բաւարար միջոցներ չձեռնարկելու մէջ:
Կառավարութեան պարտքն է «հոգ տանիլ այս բոլոր անտառներու մասին, վերականգնել անտառները եւ առաջին հերթին մարել հրդեհները»,- ըսած է Էրտողան: «Միաժամանակ, բնակելի տարածքներուն մէջ հրդեհներու պատասխանատուութիւնը քաղաքապետարաններու վրայ է»:
Անթալիոյ, Մուղլայի, Իզմիրի եւ Այտինի քաղաքապետարանները, որոնց կը ղեկավարեն հիմնական ընդդիմադիր Ժողովրդահանրապետական կուսակցութեան քաղաքապետները, «կը կրեն առաջին աստիճանի պատասխանատուութիւն»,- շարունակած է ան:
Կառավարութիւնը քննադատութեան ենթարկուած է անտառային հրդեհներուն ուշացած եւ անբաւարար արձագանգի համար: Քննադատները Էրտողանի գրասենեակը կը մեղադրեն շահարկումներու մէջ: Թուրքիոյ օդանաւային կոմիտէն (THK) միջոցներ չէ ստացած հրդեհաշիջման օդանաւերու իր նաւատորմի պահպանման համար, եւ ներկայիս քանի մը օդանաւեր կը մնան իրենց տեղը, քանի որ պատրաստ չեն թռիչքի:
Ընկերային ցանցերու մէջ թուրք օգտատէրերու շրջանին արշաւ սկսած է, որ կոչ կ'ընէ միջազգային հանրութեան օգնութիւն ուղարկելու Թուրքիա՝ օդանաւերու եւ ուղղաթիռներու տեսքով, որոնք կ'օգնեն պայքարելու հրդեհներու դէմ:
