Հայաստանի տնտեսական ցուցանիշը նահանջ գրանցած է

Տնտեսական աշխուժութեան ցուցանիշը այս տարուան Յունուար-Յունիսին 4,7 տոկոսով նուազած է 2019-ի նոյն ժամանակահատուածի համեմատ: Այս մասին կը փաստեն ՀՀ ազգային վիճակագրական կոմիտէի հրապարակած տուեալները:

Արդիւնաբերական արտադրանքի ծաւալը աճած է 1,5 տոկոսով, գիւղատնտեսութեան համախառն արտադրանքի ծաւալը` 1,7 տոկոսով: Շինարարութեան ծաւալն այս տարուան Յունուար-Յունիսին նախորդ տարուան նոյն ժամանակի համեմատ նուազած է 23,4 տոկոսով: Առեւտուրի շրջանառութեան մէջ նուազումը կազմած է 11,1 տոկոս, իսկ մատուցուած ծառայութիւններու ծաւալը՝ 6,4 տոկոսով:

2020 թուականի առաջին վեց ամիսներուն սպառողական գիներու ցուցանիշը աճած է 0,5 տոկոսով, արդիւնաբերական արտադրանքի գիներունը՝ 0,7 տոկոսով: Ելեկտրականութեան արտադրութեան ծաւալը աճած է 4,4 տոկոսով: Միջին ամսական անուանական աշխատավարձը Հայաստանի մէջ Յունուար-Յունիսին աճած է 5,4 տոկոսով` կազմելով 186 հազար 410 դրամ: Ի դէպ` պետական օղակին մէջ միջին ամսական աշխատավարձը աւելցած է 8,3 տոկոսով, իսկ ոչ պետականինը` 3,8 տոկոսով:

Արտաքին առեւտրաշրջանառութեան ծաւալներուն մէջ ` նախորդ տարուան նոյն ժամանակի համեմատ նուազած է շուրջ 10,7 տոկոսով, որուն մէջ`  արտահանումը նուազած է 6,5 տոկոսով, իսկ ներմուծումը` 12,9 տոկոսով:

Դրամի փոխարժէքը ԱՄՆ տոլարի նկատմամբ եղած է 483.50:

Տնտեսական աշխուժութեան նուազումը պայմանաւորուած է «Քորոնա» ժահրի համավարակով, որուն հետեւանքով աշխարհի գրեթէ բոլոր երկիրներու տնտեսութիւնները մեծ վնասներ կը կրեն: