Արայիկ Յարութիւնեանի երդմնակալութիւնը՝ առանց լրագրողներու

Արցախի Հանրապետութեան նորընտիր նախագահին երդման արարողութեան ներկայ պիտի ըլլայ ՀՀ վարչապետ Նիկոլ Փաշինեան: Պաշտօնական արարողութիւնը տեղի պիտի ունենայ Ազգային ժողովի յատուկ նիստի ժամանակ, 21 Մայիսին` ժամը 18:00-ին, Շուշիի մշակոյթի եւ երիտասարդութեան կեդրոնի դահլիճին մէջ:
Արցախի նորընտիր նախագահ Արայիկ Յարութիւնեանի մամուլի խօսնակ Վահրամ Պօղոսեան ֆէյսպուքեան իր էջին վրայ գրած է, որ Արցախի Հանրապետութեան նախագահի երդմնակալութեան հանդիսաւոր արարողութիւնը պիտի հեռարձակուի ուղիղ եթերով, իսկ լրագրողներու մուտքը չէ թոյլատրուած:
Ան գրած է.
«Լրատուամիջոցներու յարգելի՛ ներկայացուցիչներ,
Կը տեղեկացնեմ, որ 21 Մայիսին` ժամը 18:00-ին, Շուշի քաղաքին մէջ կայանալիք` Արցախի Հանրապետութեան նախագահի երդմնակալութեան հանդիսաւոր արարողութիւնը ուղիղ եթերով պիտի հեռարձակեն՝ Արցախի հանրային, Հայաստանի հանրային, Երկիր մետիա, Կեդրոն, ԱՐ հեռուստաընկերութիւնները:
Պիտի ապահովուի նաեւ լուսանկարներու առցանց տրամադրումը:
Լրագրողներու մուտքը դահլիճ չէ թոյլատրուած, որուն համար նախապէս ներողութիւն կը խնդրենք բոլորէդ»: