Հայաստանի մէջ պիտի հիմնուի հանրակառքերու արտադրութիւն

Հայաստանի մէջ պիտի հիմնուի Եւրասիական տնտեսական միութեան շուկայի սպառման համար նախատեսուած հանրակառքերու արտադրութիւն՝ քորէական «Եանկսան» (Youngsan) ընկերութեան եւ Հայաստանի պետական հետաքրքրութիւններու ֆոնտի համատեղ ծրագրի ծիրէն ներս: Ներդրումային նոր ծրագրի արժէքը կը գնահատուի 4,4 միլիոն տոլար: «Արմէնբրես»ի հետ այս թմեայի շուրջ զրուցած է Հայաստանի պետական հետաքրքրութիւններու ֆոնտի գլխաւոր տնօրէն Դաւիթ Փափազեան:

«Պիտի հիմնուի հանրակառքերու հաւաքման կեդրոն: Հանրակառքերը նախատեսուած պիտի ըլլան Եւրասիական տնտեսական միութեան շուկային համար: Շատ յստակ թիրախաւորում կայ: Հայաստանը կը դառնայ յարմարաւէտ երկիր միջազգային ձեռնարկութիւններուն համար:Անոնք միակը չեն, որոնց հետ քննարկումներ կը ծաւալին՝ նպատակ ունենալով Հայաստանը օգտագործել որպէս արտադրական կէտ՝ ԵԱՏՄ երկիրներ արտադրանք վաճառելու համար»,- ըսած է Փափազեան:

Քորէական ընկերութեան կողմէն նախաձեռնութիւնը եղած է դեռ նախորդ տարի: Ընկերութեան ներկայացուցիչները կապ հաստատած են ՀՀ տնտեսութեան նախարարութեան  եւ Ներդրումներու աջակցման կեդրոնի հետ: 

«Նախորդ տարի ընկերութեան կողմէ աշխատանքներ տարուած են ՀՀ տնտեսութեան նախարարութեան եւ Ներդրումներու աջակցման կեդրոնին հետ: Որոշում կայացուած է ծրագրի յետագայ ընթացքը ապահովել Հայաստանի պետական հետաքրքրութիւններու ֆոնտին հետ համագործակցութեամբ»,- յայտնած է նախարարի մամուլի խօսնակ Աննա Օհանեան:

Փափազեանի խօսքիվ, «Youngsan»-ը բաւական մեծ ձեռնարկութիւն է, անցեալ տարի կէս միլիառ տոլարէ աւելի վաճառք է ունեցած է: Հայաստանի մէջ արտադրուող հանրակառքերուն վերաբերեալ դեռ պէտք է յստակեցումներ կատարուին: Պիտի արտադրուին, հաւանաբար, 3 տեսակի հանրակառքեր, որոնց երկարութիւնը պիտի հասնի մինչեւ 10 մեթրի:

Ֆոնտի տնօրէնին խօսքով՝ առ այժմ հումքը պիտի բերուի դուրսէն, սակայն, նպատակ կայ ժամանակի ընթացքին հումքը նոյնպէս արտադրուի Հայաստանի մէջ։

Ձեռնարկութիւնը կը նախատեսուի գործարկել այս տարի: Գործարանի յստակ վայրը դեռ չեն որոշած, կը քննարկուի 3 տարբերակ, պիտի յստակացնեն արտերկրի գործընկերներու հետ։