Նախկին պատգամաւոր Առաքել Մովսիսեանի (Շմայսի) որդին կալանաւորուեցաւ
Պարտադիր ժամկէտային զինծառայող, շարքային Վահրամ Մկրտիչի Աւագեանի մահուան դէպքի առթիւ քննուող քրէական գործով մեղադրեալ Դաւիթ Մովսիսեանի նկատմամբ որպէս խափանման միջոց ընտրուած է կալանաւորումը:
Այս մասին 4 փետրուարին, ֆեյսպուքեան իր էջին գրած է ՀՀ Քննչական կոմիտէի բաժանմունքի տեղեկատւութեան եւ հասարակայնութեան հետ կապերու բաժնի պետ Նայիրա Յարութիւնեանը:
Նշենք, որ Դաւիթ Մովսիսեանին մեղադրանք առաջադրուած է ՀՀ քրէական օրէնսգիրքի 359-րդ յօդուածի 3-րդ մասով, այն է՝ զինծառայողներու փոխյարաբերութիւններու կանոնագրքային կանոնները խախտելը անոնց միջեւ ստորադասութեան (ենթակայութեան) յարաբերութիւններու բացակայութեան պարագային, որ անզգուշութեամբ առաջացուցած է ծանր հետեւանքներ:
NEWS.am-ի հետ զրոյցի ժամանակ անոր պաշտպան Աշոտ Ապրէսեանն ըսած էր, որ Մովսիսեանն իրեն առաջադրուած մեղադրանքը չի ճանչնար:
Յիշեցնենք, որ պաշտպանութեան նախարար Դաւիթ Տօնոյեանը ըսած էր, որ Արցախի մէջ 30 յունուարին մահացած զինծառայող Վահրամ Աւագեանի գործով 3 ձերբակալուած կայ, որոնցմէ մէկն ալ նախկին պատգամաւոր Առաքել Մովսիսեանի (Շմայսի) որդին է:
