Հնդկաստանէն Հայաստանին ռատարային արդիական համակարգեր պիտի մատակարարէ

Հնդկաստանը Հայաստանին ռատիօտեղորոշիչ 4 Swathi ռատիոտեղակայանք (radar) համակարգ մատակարարելու 40 միլիոն տոլար արժողութեամբ գործարք կնքած է: Հնդկաստանը յայտարարուած մրցոյթին յաղթած է Ռուսիոյ եւ Լեհաստանին: «Արմէնբրես»-ի հաղորդմամբ` այս մասին կը հաղորդեն հնդկական լրատուամիջոցները:

Timesnownews.com կայքը, յղում ընելով Հնդկաստանի կառավարութեան իր աղբիւրներուն, գրած է, որ ռատիոտեղակայանքային համակարգը մշակուած է Պետական պաշտպանական հետազօտութիւններու եւ զարգացման կազմակերպութեան ելեկտրոբանութեան եւ ռատիոտեղակայանքներու զարգացման հիմնադրամի Պանկալորի (Պենկալուրու) տարրալուծարանի կողմէ եւ արտադրուած է «Bharat Electronics Limited (BEL)»-ի կողմէ: Կայքի տեղեկութիւններով` Հնդկաստանը արդէն սկսած է ռատիոտեղակայանքային համակարգի մատակարարումը Հայաստանին:

Business Today ի հերթին կը տեղեկացնէ, որ Հայաստան մանրամասն փորձարկած է նաեւ Ռուսիոյ եւ Լեհաստանի առաջարկուած համակարգերը, սակայն յետոյ ընտրած է հնդկականը:

ՀՀ պաշտպանութեան նախարարութիւնը, սակայն, առայժմ չի մեկնաբաներ այս տեղեկութիւնը: