Հանրաքուէի նախապատրաստման եւ կայացման աշխատանքները կը դադրեցուին․ ԿԸՅ
Հայաստանի Հանրապետութեան կեդրոնան ընտրական յանձնաժողովը յայտարարութիւն տարածած է՝ յայտնելով, որ սահմանադրական փոփոխութիւններու հանրաքուէի նախապատրաստման եւ կայացման նպատակով իրականացուող բոլոր աշխատանքները պիտի դադրեցուին գործընթացի բոլոր մասնակիցներու կողմէ։ «Արմէնբրես»-ը կը ներկայացնէ ՀՀ կեդրոնական ընտրական յանձնաժողովի յայտարարութիւնը․
«Հիմք ընդունելով Հայաստանի Հանրապետութեան կառավարութեան 16.03.2020թ. «Հայաստանի Հանրապետութեան մէջ արտակարգ դրութիւն յայտարարելու մասին» թիւ 298-Ն որոշումը եւ ղեկավարուելով Հայաստանի Հանրապետութեան Սահմանադրութեան 208-րդ յօդուածով եւ «Հանրաքուէի մասին» Հայաստանի Հանրապետութեան սահմանադրական օրէնքի 6-րդ յօդուածի 1-ին մասով` Կեդրոնական ընտրական յանձնաժողովը կը տեղեկացնէ, որ Հայաստանի Հանրապետութեան Սահմանադրութեան փոփոխութիւններու հանրաքուէի նախապատրաստման եւ կայացման նպատակով իրականացուող բոլոր աշխատանքները, գործընթացները եւ միջոցառումները պիտի դադրեցուին գործընթացի բոլոր մասնակիցներու կողմէ»:
