«Քորոնա»ի Տագնապ. Հայաստանին կարեւոր աջակցութիւն

Նոր տեսակի «Քորոնա» ժահրի տարածումը կանխելու նպատակով Հայաստանին օգնութիւն պիտի տրամադրուի Ամերիկայի Միացեալ Նահանգներու, Չինաստանի եւ Եւրոպական միութեան կողմէ, մամուլի ասուլիսին ժամանակ ըսաւ Արտաքին գործոց նախարարի տեղակալ Աւետ Ատոնց։

«ԱՄՆ-ն Հայաստանին պիտի տրամադրէ 1.1 մլն ԱՄՆ տոլարի օգնութիւն։ ԵՄ-ն 140 մլն եւրօ գումար պիտի տրամադրէ արեւելեան 6 գործընկերներուն, որոնք պիտի բաշխուին երկիրներու միջեւ։ Այդ 140 միլիոնէն 30 միլիոնն ԱՀԿ-ի (Առողջապահութեան համաշխարհային կազմակերպութիւն) միջոցով պիտի ուղղուի համապատասխան առողջապահական սարքաւորումներ ձեռք բերելուն, 100 միլիոնը պիտի ուղղուի ՓՄՁ-ներուն (Փոքր եւ միջին ձեռնարկատիրութեան) աջակցելուն, եւ 10 միլիոնը՝ ՀԿ-ներուն՝ (հասարակական կազմակերպութիւններ) COVID-19-ի դէմ պայքարի համար։ Օրեր առաջ Զոհրապ Մնացականեանը նամակ ստացած է Չինաստանի իր գործընկերոջէն, ուր Չինաստանի կառավարութիւնն իր պատրաստակամութիւնը յայտնած է միջոցներու եւ հնարաւորութիւններու սահմաններուն մէջ ՀՀ-ին աջակցութիւն ցուցաբերելու առումով»,- յայտնեց Ատոնցը։